Erdi Aroan Nafar erresumako eskualdeak tenentzien bidez antolatzen ziren. Kargu hauek ez ziren bizitza osorako, ezta herentzia bitartez eskuratzen. Tenenteak erresumako funtzionarioak ziren, eta postua eskuratzeko aldez aurretik hautatuak izan behar ziren.

Gurea, gasteiztarrona, 1198. urteaz geroztik Martin Ttipia dugu. Bera zen 1199. urtean hiria Gaztelako erregearen armadaren erasoarengandik babesteko arduraduna. Garai hartako gasteiztarrek sutsuki egin zioten aurre askoz handiagoa zen gudarosteari, eta 7-9 hilabetez gure harresietatik at mantendu zuten. Martin Ttipiaren lehenengo aipamenak Zangotzan kokatzen du. 1189 eta 1194 bitartean tenente izan zen Garaziko gotorleku nagusietan, hain justu gaurko Behe Nafarroaren osaketa abiatzen zen unean. Konkistaren ondoren, Erriberan egon zen tenente moduan Nafar erresumaren defentsan, beraz ondoriozta dezakegu gerlari engaiatua izateaz gain leiala ere bazela. 1210ean dugu haren azken aipamena.

Doazkio hemendik gure eskerrik beroenak!! BETIKO ARGIA